დედამიწის
გაქცევა
ნაწილი
პირველი
დროის
ოკეანეში
გადარჩენილი
შემდეგი წლების მანძილზე ხშირად და დიდი ხნით მივდიოდი ხოლმე
აფრიკაში საქმეებზე. დაბრუნებისას ყოველთვის ვხვდებოდი პოლს.
აღარაფერს აქვეყნებდა, მაგრამ გამალებული მუშაობდა მისი
მითითებებით აგებულ კერძო ლაბორატორიაში. ჩემი მეორე
მოგზაურობის დროს მან ცოლად შეირთო ანი, ფიზიკის ფაკულტეტის
სტუდენტი, ხოლო მესამე მოგზაურობის დროს კი შეეძინათ ვაჟი.
კატასტროფა მაშინ მოხდა, როცა მეოთხედ დავბრუნდი.
კლერმონში გვაინი ღამით ჩავედი და დილაადრიან გავეშურე პოლის
ლაბორატორიაში. ლაბორატორია პატარა ბორცვზე იდგა,
განმარტოებულ ადგილას, ქალაქიდან რამდენიმე კილომეტრში.
გზატკეცილიდან გვერდითა გზაზე, რომ ვუხვევდი თვალში მეცა
აბრა: „საშიშია სიცოცხლისათვის!“
ჩავთვალე, რომ ეს გაფრთხილება მე არ მეხებოდა და არ
გავჩერებულვარ. სახლის წინ მდელოზე არც კი ვიყავი მისული, რომ
თმები ყალყზე დამიდგა და გრძელმა იისფერმა ნაპერწკალმა
გაიელვა საჭესა და ხელსაწყოთა დაფას შორის. მკვეთრად
დავამუხრუჭე. დიდი ფანჯრის მიღმა პოლის მაღალი ფიგურა
დავინახე. ხელი ამიწია. არ ვიცი, მემშვიდობებოდა თუ
მიბრძანებდა, გავჩერებულიყავი. იისფერი ნათება უეცრად
დამაბრმავებელი გახდა და თვალები დავხუჭე. თვალები რომ
გავახილე, ყველაფერში უკვე წესრიგში იყო, მაგრამ ისეთი
შეგრძნება მქონდა. რომ რაღაც გამოუსწორებელი მოხდა.
მანქანიდან სწრაფად გადმოვედი, გასაღებით ჩაკეტილი კარი
მხარით ჩამოვიღე. შიგნიდან ბოლქვებად გამოდიოდა სქელი კვამლი
და უღრუბლო ცაში ადიოდა. ლაბორატორიას ცეცხლი ეკიდა. ძლივს
ვიპოვე პოლი: იგი რაღაც უცნაური ხელსაწყოს გვერდით იწვა. მის
თავზე დავიხარე. მკვდარი იყო და სახეზე ღიმილი შეჰყინვოდა.
მის გვერდით უძრავად იწვა ანი.
ანი გარეთ გამოვიყვანე, პოლის გამოსაყვანად შევბრუნდი და დიდი
ძალისხმევით, როგორც იქნა გარეთ გამოვათრიე გრძელი მძიმე
ცხედარი. როგორც კი იგი ანის გვერდით მივაწვინე, სახლში ყრუ
აფეთქების ხმა გაისმა და ცეცხლი მთელს სახლს მოედო. ისინი
მანქანაში მოვათავსე და, მიუხედევად იმისა, რომ მხოლოდ
სასწაულის იმედი შეიძლებოდა მქონოდა, დიდი სისწრაფით ქალაქის
საავადმყოფოს მივაშურე. ვაგლახ, რომ სასწაულები არ ხდება.
ორივე მკვდარი იყო.
სულ ესაა. სამოქალაქო და სამხედრო ხელისუფლებამ საგულდაგულოდ
გამოიკვლია იქაურობა, ნახანძრალი გადაქექა და მთელი ნაცარი
გაცრა, მაგრამ ვერაფერი იპოვეს. ჩემთან ლაბორატორიაში დამხვდა
დალუქული კონვერტი, რომელშიც სქელი ხელნაწერი იდო. წინა დღით
პოლს თავად მოეტანა იგი და ჩემი თანაშემწისათვის გადაეცა. ამ
ფურცლებს ახლა წაიკითხავთ.
